Sri Venkateshwara Sahasranama Stotram – శ్రీ వేంకటేశ సహస్రనామ స్తోత్రం

శ్రీవసిష్ఠ ఉవాచ |

భగవన్ కేన విధినా నామభిర్వేంకటేశ్వరమ్ |

పూజయామాస తం దేవం బ్రహ్మా తు కమలైః శుభైః || ౧ ||

పృచ్ఛామి తాని నామాని గుణ యోగపరాణి కిమ్ |

ముఖ్యవృత్తీని కిం బ్రూహి లక్షకాణ్యథవా హరేః || ౨ ||

నారద ఉవాచ |

నామాన్యనంతాని హరేః గుణయోగాని కాని చిత్ |

ముఖ్య వృత్తీని చాన్యాని లక్షకాణ్యపరాణి చ || ౩ ||

పరమార్థైః సర్వశబ్దైరేకో జ్ఞేయః పరః పుమాన్ |

ఆదిమధ్యాంతరహితః త్వవ్యక్తోఽనంతరూపభృత్ || ౪ ||

చంద్రార్క వహ్నివాయ్వాది గ్రహర్క్షాణి నభో దిశః |

అన్వయవ్యతిరేకాభ్యాం సంతి నో సంతి యన్మతేః || ౫ ||

తస్య దేవస్య నామ్నాం హి పారం గంతుం హి కః క్షమః |

తథాఽపి చాభిధానాని వేంకటేశస్య కానిచిత్ || ౬ ||

బ్రహ్మగీతాని పుణ్యాని తాని వక్ష్యామి సువ్రత |

యదుచ్చారణమాత్రేణ విముక్తాఘః పరం వ్రజేత్ || ౭ ||

వేంకటేశస్య నామ్నాం హి సహస్రస్య ఋషిర్విధిః |

ఛందోఽనుష్ఠుప్ తథా దేవః శ్రీవత్సాంకో రమాపతిః || ౮ ||

బీజభూతస్తథోంకారో హ్రీం క్లీం శక్తిశ్చ కీలకమ్ |

ఓం నమో వేంకటేశాయేత్యాదిర్మంత్రోఽత్ర కథ్యతే || ౯ ||

బ్రహ్మాండగర్భః కవచమస్త్రం చక్రగదాధరః |

వినియోగోఽభీష్టసిద్ధౌ హృదయం సామగాయనః ||

అస్య శ్రీ వేంకటేశ సహస్రనామ స్తోత్ర మహామంత్రస్య బ్రహ్మా ఋషిః – అనుష్టుప్ ఛందః శ్రీవత్సాంకో రమాపతిర్దేవతా ఓం బీజం హ్రీం శక్తిః క్లీం కీలకం బ్రహ్మాండగర్భ ఇతి కవచం చక్రగదాధర ఇత్యస్త్రం సామగానమితి హృదయం ఓం నమో వేంకటేశాయేత్యాదిర్మంత్రః శ్రీ వేంకటేశ ప్రీత్యర్థే జపే వినియోగః ||

ధ్యానం |

భాస్వచ్ఛంద్రమసౌ యదీయనయనే భార్యా యదీయా రమా

యస్మాద్విశ్వసృడప్యభూద్యమికులం యద్ధ్యానయుక్తం సదా

నాథో యో జగతాం నగేంద్రదుహితుర్నాథోఽపి యద్భక్తిమాన్

తాతో యో మదనస్య యో దురితహా తం వేంకటేశం భజే ||

ఊర్ధ్వౌ హస్తౌ యదీయౌ సురరిపుదళనే బిభ్రతౌ శంఖచక్రే

సేవ్యావంఘ్రీ స్వకీయావభిదధదధరో దక్షిణో యస్య పాణిః |

తావన్మాత్రం భవాబ్ధిం గమయతి భజతామూరుగో వామపాణిః

శ్రీవత్సాంకశ్చ లక్ష్మీర్యదురసి లసతస్తం భజే వేంకటేశమ్

ఇతి ధ్యాయన్వేంకటేశం శ్రీవత్సాంకం రమాపతిమ్ |

వేంకటేశో విరూపాక్ష ఇత్యారభ్య జపేత్క్రమాత్ || ౧౦ ||

(స్తోత్రం)

వేంకటేశో విరూపాక్షో విశ్వేశో విశ్వభావనః |

విశ్వసృఙ్ విశ్వసంహర్తా విశ్వప్రాణో విరాడ్వపుః || ౧౧ ||

శేషాద్రినిలయోఽశేషభక్తదుఃఖప్రణాశనః |

శేషస్తుత్యః శేషశాయీ విశేషజ్ఞో విభుః స్వభూః || ౧౨ ||

విష్ణుర్జిష్ణుశ్చ వర్ధిష్ణురుత్సవిష్ణుః సహిష్ణుకః |

భ్రాజిష్ణుశ్చ గ్రసిష్ణుశ్చ వర్తిష్ణుశ్చ భరిష్ణుకః || ౧౩ ||

కాలయంతా కాలగోప్తా కాలః కాలాంతకోఽఖిలః |

కాలగమ్యః కాలకంఠవంద్యః కాలకలేశ్వరః || ౧౪ ||

శంభుః స్వయంభూరంభోజనాభిస్తంభితవారిధిః |

అంభోధినందినీజానిః శోణాంభోజపదప్రభః || ౧౫ ||

కంబుగ్రీవః శంబరారిరూపః శంబరజేక్షణః |

బింబాధరో బింబరూపీ ప్రతిబింబక్రియాతిగః || ౧౬ ||

గుణవాన్ గుణగమ్యశ్చ గుణాతీతో గుణప్రియః

దుర్గుణధ్వంసకృత్సర్వసుగుణో గుణభాసకః || ౧౭ ||

పరేశః పరమాత్మా చ పరంజ్యోతిః పరా గతిః |

పరం పదం వియద్వాసాః పారంపర్యశుభప్రదః || ౧౮ ||

బ్రహ్మాండగర్భో బ్రహ్మణ్యో బ్రహ్మసృఢ్బ్రహ్మబోధితః |

బ్రహ్మస్తుత్యో బ్రహ్మవాదీ బ్రహ్మచర్యపరాయణః || ౧౯ ||

సత్యవ్రతార్థసంతుష్టస్సత్యరూపీ ఝషాంగవాన్ |

సోమకప్రాణహారీ చానీతామ్నాయోఽబ్ధిసంచరః || ౨౦ ||

దేవాసురవరస్తుత్యః పతన్మందరధారకః |

ధన్వంతరిః కచ్ఛపాంగః పయోనిధివిమంథకః || ౨౧ ||

అమరామృతసంధాతా ధృతసమ్మోహినీవపుః |

హరమోహకమాయావీ రక్షఃసందోహభంజనః || ౨౨ ||

హిరణ్యాక్షవిదారీ చ యజ్ఞో యజ్ఞ విభావనః |

యజ్ఞీయోర్వీసముద్ధర్తా లీలాక్రోడః ప్రతాపవాన్ || ౨౩ ||

దండకాసురవిధ్వంసీ వక్రదంష్ట్రః క్షమాధరః |

గంధర్వశాపహరణః పుణ్యగంధో విచక్షణః || ౨౪ ||

కరాళవక్త్రః సోమార్కనేత్రః షడ్గుణవైభవః |

శ్వేతఘోణీ ఘూర్ణితభ్రూర్ఘుర్ఘురధ్వనివిభ్రమః || ౨౫ ||

ద్రాఘీయాన్ నీలకేశీ చ జాగ్రదంబుజలోచనః |

ఘృణావాన్ ఘృణిసమ్మోహో మహాకాలాగ్నిదీధితిః || ౨౬ ||

జ్వాలాకరాళవదనో మహోల్కాకులవీక్షణః |

సటానిర్భిణ్ణమేఘౌఘో దంష్ట్రారుగ్వ్యాప్తదిక్తటః || ౨౭ ||

ఉచ్ఛ్వాసాకృష్టభూతేశో నిఃశ్వాసత్యక్తవిశ్వసృట్ |

అంతర్భ్రమజ్జగద్గర్భోఽనంతో బ్రహ్మకపాలహృత్ || ౨౮ ||

ఉగ్రో వీరో మహావిష్ణుర్జ్వలనః సర్వతోముఖః |

నృసింహో భీషణో భద్రో మృత్యుమృత్యుః సనాతనః || ౨౯ ||

సభాస్తంభోద్భవో భీమః శీరోమాలీ మహేశ్వరః |

ద్వాదశాదిత్యచూడాలః కల్పధూమసటాచ్ఛవిః || ౩౦ ||

హిరణ్యకోరస్థలభిన్ననఖః సింహముఖోఽనఘః |

ప్రహ్లాదవరదో ధీమాన్ భక్తసంఘ ప్రతిష్ఠితః || ౩౧ ||

బ్రహ్మరుద్రాదిసంసేవ్యః సిద్ధసాధ్యప్రపూజితః |

లక్ష్మీనృసింహో దేవేశో జ్వాలాజిహ్వాంత్రమాలికః || ౩౨ ||

ఖడ్గీ ఖేటీ మహేష్వాసీ కపాలీ ముసలీ హలీ |

పాశీ శూలీ మహాబాహుర్జ్వరఘ్నో రోగలుంఠకః || ౩౩ ||

మౌంజీయుక్ ఛాత్రకో దండీ కృష్ణాజినధరో వటుః |

అధీతవేదో వేదాంతోద్ధారకో బ్రహ్మనైష్ఠికః || ౩౪ ||

అహీనశయనప్రీతః ఆదితేయోఽనఘో హరిః |

సంవిత్ప్రియస్సామవేద్యో బలివేశ్మప్రతిష్ఠితః || ౩౫ ||

బలిక్షాలితపాదాబ్జో వింధ్యావలివిమానితః |

త్రిపాదభూమిస్వీకర్తా విశ్వరూపప్రదర్శకః || ౩౬ ||

ధృతత్రివిక్రమః సాంఘ్రినఖభిన్నాండఖర్పరః |

పజ్జాతవాహినీధారాపవిత్రితజగత్త్రయః || ౩౭ ||

విధిసమ్మానితః పుణ్యో దైత్యయోద్ధా జయోర్జితః |

సురరాజ్యప్రదః శుక్రమదహృత్ సుగతీశ్వరః || ౩౮ ||

జామదగ్న్యః కుఠారీ చ కార్తవీర్యవిదారణః |

రేణుకాయాశ్శిరోహారీ దుష్టక్షత్రియమర్దనః || ౩౯ ||

వర్చస్వీ దానశీలశ్చ ధనుష్మాన్ బ్రహ్మవిత్తమః |

అత్యుదగ్రః సమగ్రశ్చ న్యగ్రోధో దుష్టనిగ్రహః || ౪౦ ||

రవివంశసముద్భూతో రాఘవో భరతాగ్రజః |

కౌసల్యాతనయో రామో విశ్వామిత్ర ప్రియంకరః || ౪౧ ||

తాటకారిః సుబాహుఘ్నో బలాతిబలమంత్రవాన్ |

అహల్యాశాపవిచ్ఛేదీ ప్రవిష్టజనకాలయః || ౪౨ ||

స్వయంవరసభాసంస్థ ఈశచాపప్రభంజనః |

జానకీపరిణేతా చ జనకాధీశసంస్తుతః || ౪౩ ||

జమదగ్నితనూజాతయోద్ధాఽయోధ్యాధిపాగ్రణీః |

పితృవాక్యప్రతీపాలస్త్యక్తరాజ్యః సలక్ష్మణః || ౪౪ ||

ససీతశ్చిత్రకూటస్థో భరతాహితరాజ్యకః |

కాకదర్పప్రహర్తా చ దండకారణ్యవాసకః || ౪౫ ||

పంచవట్యాం విహారీ చ స్వధర్మపరిపోషకః |

విరాధహాఽగస్త్యముఖ్యమునిసమ్మానితః పుమాన్ || ౪౬ ||

ఇంద్రచాపధరః ఖడ్గధరశ్చాక్షయసాయకః |

ఖరాంతకో దూషణారిస్త్రిశిరస్కరిపుర్వృషః || ౪౭ ||

తతః శూర్పణఖానాసాచ్ఛేత్తా వల్కలధారకః |

జటావాన్ పర్ణశాలాస్థో మారీచబలమర్దకః || ౪౮ ||

పక్షిరాట్కృతసంవాదో రవితేజా మహాబలః |

శబర్యానీతఫలభుగ్ఘనూమత్పరితోషితః || ౪౯ ||

సుగ్రీవాభయదో దైత్యకాయక్షేపణభాసురః |

సప్తతాలసముచ్ఛేత్తా వాలిహృత్కపిసంవృతః || ౫౦ ||

వాయుసూనుకృతాసేవస్త్యక్తపంపః కుశాసనః |

ఉదన్వత్తీరగః శూరో విభీషణవరప్రదః || ౫౧ ||

సేతుకృద్దైత్యహా ప్రాప్తలంకోఽలంకారవాన్ స్వయమ్ |

అతికాయశిరశ్ఛేత్తా కుంభకర్ణవిభేదనః || ౫౨ ||

దశకంఠశిరోధ్వంసీ జాంబవత్ప్రముఖావృతః |

జానకీశః సురాధ్యక్షః సాకేతేశః పురాతనః || ౫౩ ||

పుణ్యశ్లోకో వేదవేద్యః స్వామితీర్థనివాసకః |

లక్ష్మీసరఃకేళిలోలో లక్ష్మీశో లోకరక్షకః || ౫౪ ||

దేవకీగర్భసంభూతో యశోదేక్షణలాలితః |

వసుదేవకృతస్తోత్రో నందగోపమనోహరః || ౫౫ ||

చతుర్భుజః కోమలాంగో గదావాన్నీలకుంతలః |

పూతనాప్రాణసంహర్తా తృణావర్తవినాశనః || ౫౬ ||

గర్గారోపితనామాంకో వాసుదేవో హ్యాధోక్షజః |

గోపికాస్తన్యపాయీ చ బలభద్రానుజోఽచ్యుతః || ౫౭ ||

వైయాఘ్రనఖభూషశ్చ వత్సజిద్వత్సవర్ధనః |

క్షీరసారాశనరతో దధిభాండప్రమర్దనః || ౫౮ ||

నవనీతాపహర్తా చ నీలనీరదభాసురః |

ఆభీరదృష్టదౌర్జన్యో నీలపద్మనిభాననః || ౫౯ ||

మాతృదర్శితవిశ్వాస్యః ఉలూఖలనిబంధనః |

నలకూబరశాపాంతో గోధూలిచ్ఛురితాంగకః || ౬౦ ||

గోసంఘరక్షకః శ్రీశో బృందారణ్యనివాసకః |

వత్సాంతకో బకద్వేషీ దైత్యాంబుదమహానిలః || ౬౧ ||

మహాజగరచండాగ్నిః శకటప్రాణకంటకః |

ఇంద్రసేవ్యః పుణ్యగాత్రః ఖరజిచ్చండదీధితిః || ౬౨ ||

తాళపక్వఫలాశీ చ కాళీయఫణిదర్పహా |

నాగపత్నీస్తుతిప్రీతః ప్రలంబాసురఖండనః || ౬౩ ||

దావాగ్నిబలసంహారీ ఫలాహారీ గదాగ్రజః |

గోపాంగనాచేలచోరః పాథోలీలావిశారదః || ౬౪ ||

వంశీగానప్రవీణశ్చ గోపీహస్తాంబుజార్చితః |

మునిపత్న్యాహృతాహారో మునిశ్రేష్ఠో మునిప్రియః || ౬౫ ||

గోవర్ధనాద్రిసంధర్తా సంక్రందనతమోఽపహః |

సదుద్యానవిలాసీ చ రాసక్రీడాపరాయణః || ౬౬ ||

వరుణాభ్యర్చితో గోపీప్రార్థితః పురుషోత్తమః |

అక్రూరస్తుతిసంప్రీతః కుబ్జాయౌవనదాయకః || ౬౭ ||

ముష్టికోరఃప్రహారీ చ చాణూరోదరదారణః |

మల్లయుద్ధాగ్రగణ్యశ్చ పితృబంధనమోచకః || ౬౮ ||

మత్తమాతంగపంచాస్యః కంసగ్రీవానికృంతనః |

ఉగ్రసేనప్రతిష్టాతా రత్నసింహాసనస్థితః || ౬౯ ||

కాలనేమిఖలద్వేషీ ముచుకుందవరప్రదః |

సాల్వసేవితదుర్ధర్షరాజస్మయనివారణః || ౭౦ ||

రుక్మగర్వాపహారీ చ రుక్మిణీనయనోత్సవః |

ప్రద్యుమ్నజనకః కామీ ప్రద్యుమ్నో ద్వారకాధిపః || ౭౧ ||

మణ్యాహర్తా మహామాయో జాంబవత్కృతసంగరః |

జాంబూనదాంబరధరో గమ్యో జాంబవతీవిభుః || ౭౨ ||

కాలిందీప్రథితారామకేలిర్గుంజావతంసకః |

మందారసుమనోభాస్వాన్ శచీశాభీష్టదాయకః || ౭౩ ||

సత్రాజిన్మానసోల్లాసీ సత్యాజానిః శుభావహః |

శతధన్వహరః సిద్ధః పాండవప్రియకోత్సవః || ౭౪ ||

భద్రప్రియః సుభద్రాయా భ్రాతా నాగ్నాజితీవిభుః |

కిరీటకుండలధరః కల్పపల్లవలాలితః || ౭౫ ||

భైష్మీప్రణయభాషావాన్ మిత్రవిందాధిపోఽభయః |

స్వమూర్తికేలిసంప్రీతో లక్ష్మణోదారమానసః || ౭౬ ||

ప్రాగ్జ్యోతిషాధిపధ్వంసీ తత్సైన్యాంతకరోఽమృతః |

భూమిస్తుతో భూరిభోగో భూషణాంబరసంయుతః || ౭౭ ||

బహురామాకృతాహ్లాదో గంధమాల్యానులేపనః |

నారదాదృష్టచరితో దేవేశో విశ్వరాడ్ గురుః || ౭౮ ||

బాణబాహువిదారశ్చ తాపజ్వరవినాశకః |

ఉషోద్ధర్షయితాఽవ్యక్తః శివవాక్తుష్టమానసః || ౭౯ ||

మహేశజ్వరసంస్తుత్యః శీతజ్వరభయాంతకః |

నృగరాజోద్ధారకశ్చ పౌండ్రకాదివధోద్యతః || ౮౦ ||

వివిధారిచ్ఛలోద్విగ్నబ్రాహ్మణేషు దయాపరః |

జరాసంధబలద్వేషీ కేశిదైత్యభయంకరః || ౮౧ ||

చక్రీ చైద్యాంతకః సభ్యో రాజబంధవిమోచకః |

రాజసూయహవిర్భోక్తా స్నిగ్ధాంగః శుభలక్షణః || ౮౨ ||

ధానాభక్షణసంప్రీతః కుచేలాభీష్టదాయకః |

సత్త్వాదిగుణగంభీరో ద్రౌపదీమానరక్షకః || ౮౩ ||

భీష్మధ్యేయో భక్తవశ్యో భీమపూజ్యో దయానిధిః |

దంతవక్త్రశిరశ్ఛేత్తా కృష్ణః కృష్ణాసఖః స్వరాట్ || ౮౪ ||

వైజయంతీప్రమోదీ చ బర్హిబర్హవిభూషణః |

పార్థకౌరవసంధానకారీ దుఃశాసనాంతకః || ౮౫ ||

బుద్దో విశుద్ధః సర్వజ్ఞః క్రతుహింసావినిందకః |

త్రిపురస్త్రీమానభంగః సర్వశాస్త్రవిశారదః || ౮౬ ||

నిర్వికారో నిర్మమశ్చ నిరాభాసో నిరామయః |

జగన్మోహకధర్మీ చ దిగ్వస్త్రో దిక్పతీశ్వరః || ౮౭ ||

కల్కీ మ్లేచ్ఛప్రహర్తా చ దుష్టనిగ్రహకారకః |

ధర్మప్రతిష్టాకారీ చ చాతుర్వర్ణ్యవిభాగకృత్ || ౮౮ ||

యుగాంతకో యుగాక్రాంతో యుగకృద్యుగభాసకః |

కామారిః కామకారీ చ నిష్కామః కామితార్థదః || ౮౯ ||

భర్గో వరేణ్యం సవితుః శార్ఙ్గీ వైకుంఠమందిరః |

హయగ్రీవః కైటభారిః గ్రాహఘ్నో గజరక్షకః || ౯౦ ||

సర్వసంశయవిచ్ఛేత్తా సర్వభక్తసముత్సుకః |

కపర్దీ కామహారీ చ కళా కాష్టా స్మృతిర్ధృతిః || ౯౧ ||

అనాదిరప్రమేయౌజాః ప్రధానః సన్నిరూపకః |

నిర్లోపో నిఃస్పృహోఽసంగో నిర్భయో నీతిపారగః || ౯౨ ||

నిష్పేష్యో నిష్క్రియః శాంతో నిష్ప్రపంచో నిధిర్నయః

కర్మ్యకర్మీ వికర్మీ చ కర్మేప్సుః కర్మభావనః || ౯౩ ||

కర్మాంగః కర్మవిన్యాసో మహాకర్మీ మహావ్రతీ |

కర్మభుక్కర్మఫలదః కర్మేశః కర్మనిగ్రహః || ౯౪ ||

నరో నారాయణో దాంతః కపిలః కామదః శుచిః |

తప్తా జప్తాఽక్షమాలావాన్ గంతా నేతా లయో గతిః || ౯౫ ||

శిష్టో ద్రష్టా రిపుద్వేష్టా రోష్టా వేష్టా మహానటః |

రోద్ధా బోద్ధా మహాయోద్ధా శ్రద్ధావాన్ సత్యధీః శుభః || ౯౬ ||

మంత్రీ మంత్రో మంత్రగమ్యో మంత్రకృత్ పరమంత్రహృత్ |

మంత్రభృన్మంత్రఫలదో మంత్రేశో మంత్రవిగ్రహః || ౯౭ ||

మంత్రాంగో మంత్రవిన్యాసో మహామంత్రో మహాక్రమః |

స్థిరధీః స్థిరవిజ్ఞానః స్థిరప్రజ్ఞః స్థిరాసనః || ౯౮ ||

స్థిరయోగః స్థిరాధారః స్థిరమార్గః స్థిరాగమః|

నిశ్శ్రేయసో నిరీహోఽగ్నిర్నిరవద్యో నిరంజనః || ౯౯ ||

నిర్వైరో నిరహంకారో నిర్దంభో నిరసూయకః |

అనంతోఽనంతబాహూరురనంతాంఘ్రిరనంతదృక్ || ౧౦౦ ||

అనంతవక్త్రోఽనంతాంగోఽనంతరూపో హ్యనంతకృత్ |

ఊర్ధ్వరేతా ఊర్ధ్వలింగో హ్యూర్ధ్వమూర్ధ్వోర్ధ్వశాఖకః || ౧౦౧ ||

ఊర్ధ్వ ఊర్ధ్వాధ్వరక్షీ చ హ్యూర్ధ్వజ్వాలో నిరాకులః |

బీజం బీజప్రదో నిత్యో నిదానం నిష్కృతిః కృతీ || ౧౦౨ ||

మహానణీయన్ గరిమా సుషమా చిత్రమాలికః |

నభస్స్పృఙ్నభసో జ్యోతిర్నభస్వాన్నిర్నభా నభః || ౧౦౩ ||

అభుర్విభుః ప్రభుః శంభుర్మహీయాన్ భూర్భువాకృతిః |

మహానందో మహాశూరో మహోరాశిర్మహోత్సవః || ౧౦౪ ||

మహాక్రోధో మహాజ్వాలో మహాశాంతో మహాగుణః |

సత్యవ్రతః సత్యపరః సత్యసంధః సతాంగతిః || ౧౦౫ ||

సత్యేశః సత్యసంకల్పః సత్యచారిత్రలక్షణః |

అంతశ్చరో హ్యంతరాత్మా పరమాత్మా చిదాత్మకః || ౧౦౬ ||

రోచనో రోచమానశ్చ సాక్షీ శౌరిర్జనార్దనః |

ముకుందో నందనిష్పందః స్వర్ణబిందుః పురందరః || ౧౦౭ ||

అరిందమః సుమందశ్చ కుందమందారహాసవాన్ |

స్యందనారూఢచండాంగో హ్యానందీ నందనందనః || ౧౦౮ ||

అనసూయానందనోఽత్రినేత్రానందః సునందవాన్ |

శంఖవాన్పంకజకరః కుంకుమాంకో జయాంకుశః || ౧౦౯ ||

అంభోజమకరందాఢ్యో నిష్పంకోఽగరుపంకిలః |

ఇంద్రశ్చంద్రరథశ్చంద్రోఽతిచంద్రశ్చంద్రభాసకః || ౧౧౦ ||

ఉపేంద్ర ఇంద్రరాజశ్చ వాగింద్రశ్చంద్రలోచనః |

ప్రత్యక్ పరాక్ పరంధామ పరమార్థః పరాత్పరః || ౧౧౧ ||

అపారవాక్ పారగామో పారావారః పరావరః |

సహస్వానర్థదాతా చ సహనః సాహసీ జయీ || ౧౧౨ ||

తేజస్వీ వాయువిశిఖీ తపస్వీ తాపసోత్తమః |

ఐశ్వర్యోద్భూతికృద్భూతిరైశ్వర్యాంగకలాపవాన్ || ౧౧౩ ||

అంభోధిశాయీ భగవాన్ సర్వజ్ఞస్సామపారగః |

మహాయోగీ మహాధీరో మహాభోగీ మహాప్రభుః || ౧౧౪ ||

మహావీరో మహాతుష్టిర్మహాపుష్టిర్మహాగుణః |

మహాదేవో మహాబాహుర్మహాధర్మో మహేశ్వరః || ౧౧౫ ||

సమీపగో దూరగామీ స్వర్గమార్గనిరర్గళః |

నగో నగధరో నాగో నాగేశో నాగపాలకః || ౧౧౬ ||

హిరణ్మయః స్వర్ణరేతా హిరణ్యార్చిర్హిరణ్యదః |

గుణగణ్యః శరణ్యశ్చ పుణ్యకీర్తిః పురాణగః || ౧౧౭ ||

జన్యభృజ్జన్యసన్నద్ధో దివ్యపంచాయుధో వశీ |

దౌర్జన్యభంగః పర్జన్యః సౌజన్యనిలయోఽలయః || ౧౧౮ ||

జలంధరాంతకో భస్మదైత్యనాశీ మహామనాః |

శ్రేష్టశ్శ్రవిష్ఠో ద్రాఘిష్ఠో గరిష్ఠో గరుడధ్వజః || ౧౧౯ ||

జ్యేష్ఠో ద్రఢిష్ఠో వర్షిష్ఠో ద్రాఘీయాన్ ప్రణవః ఫణీ |

సంప్రదాయకరః స్వామీ సురేశో మాధవో మధుః || ౧౨౦ ||

నిర్నిమేషో విధిర్వేధా బలవాన్ జీవనం బలీ |

స్మర్తా శ్రోతా వికర్తా చ ధ్యాతా నేతా సమోఽసమః || ౧౨౧ ||

హోతా పోతా మహావక్తా రంతా మంతా ఖలాంతకః |

దాతా గ్రాహయితా మాతా నియంతాఽనంత వైభవః || ౧౨౨ ||

గోప్తా గోపయితా హంతా ధర్మజాగరితా ధవః |

కర్తా క్షేత్రకరః క్షేత్రప్రదః క్షేత్రజ్ఞ ఆత్మవిత్ || ౧౨౩ ||

క్షేత్రీ క్షేత్రహరః క్షేత్రప్రియః క్షేమకరో మరుత్ |

భక్తిప్రదో ముక్తిదాయీ శక్తిదో యుక్తిదాయకః || ౧౨౪ ||

శక్తియుఙ్జౌక్తికస్రగ్వీ సూక్తిరామ్నాయసూక్తిగః |

ధనంజయో ధనాధ్యక్షో ధనికో ధనదాధిపః || ౧౨౫ ||

మహాధనో మహామానీ దుర్యోధనవిమానితః |

రత్నాకరో రత్నరోచీ రత్నగర్భాశ్రయః శుచిః || ౧౨౬ ||

రత్నసానునిధిర్మౌళిరత్నాభా రత్నకంకణః |

అంతర్లక్ష్యోఽన్తరభ్యాసీ చాంతర్ధ్యేయో జితాసనః || ౧౨౭ ||

అంతరంగో దయావాంశ్చ హ్యాంతర్మాయో మహార్ణవః |

సరససిద్ధరసికః సిద్ధిః సాధ్యః సదాగతిః || ౧౨౮ ||

ఆయుఃప్రదో మహాయుష్మానర్చిష్మానోషధీపతిః |

అష్టశ్రీరష్టభాగోఽష్టకకుబ్వ్యాప్తయశో వ్రతీ || ౧౨౯ ||

అష్టాపదః సువర్ణాభో హ్యష్టమూర్తిస్త్రిమూర్తిమాన్ |

అస్వప్నః స్వప్నగః స్వప్నః సుస్వప్నఫలదాయకః || ౧౩౦ ||

దుఃస్వప్నధ్వంసకో ధ్వస్తదుర్నిమిత్తః శివంకరః |

సువర్ణవర్ణస్సంభావ్యో వర్ణితో వర్ణసమ్ముఖః || ౧౩౧ ||

సువర్ణముఖరీతీరశివధ్యాతపదాంబుజః |

దాక్షాయణీవచస్తుష్టో దూర్వాసోదృష్టిగోచరః || ౧౩౨ ||

అంబరీషవ్రతప్రీతో మహాకృత్తివిభంజనః |

మహాభిచారకధ్వంసీ కాలసర్పభయాంతకః || ౧౩౩ ||

సుదర్శనః కాలమేఘశ్యామశ్శ్రీమంత్రభావితః |

హేమాంబుజసరఃస్నాయీ శ్రీమనోభావితాకృతిః || ౧౩౪ ||

శ్రీప్రదత్తాంబుజస్రగ్వీ శ్రీకేళీః శ్రీనిధిర్భవః |

శ్రీప్రదో వామనో లక్ష్మీనాయకశ్చ చతుర్భుజః || ౧౩౫ ||

సంతృప్తస్తర్పితస్తీర్థస్నాతృసౌఖ్యప్రదర్శకః |

అగస్త్యస్తుతిసంహృష్టో దర్శితావ్యక్తభావనః || ౧౩౬ ||

కపిలార్చిః కపిలవాన్ సుస్నాతాఘవిపాటనః |

వృషాకపిః కపిస్వామిమనోఽంతఃస్థితవిగ్రహః || ౧౩౭ ||

వహ్నిప్రియోఽర్థసంభావ్యో జనలోకవిధాయకః |

వహ్నిప్రభో వహ్నితేజాః శుభాభీష్టప్రదో యమీ || ౧౩౮ ||

వారుణక్షేత్రనిలయో వరుణో వారణార్చితః |

వాయుస్థానకృతావాసో వాయుగో వాయుసంభృతః || ౧౩౯ ||

యమాంతకోఽభిజననో యమలోకనివారణః |

యమినామగ్రగణ్యశ్చ సంయమీ యమభావితః || ౧౪౦ ||

ఇంద్రోద్యానసమీపస్థ ఇంద్రదృగ్విషయః ప్రభుః |

యక్షరాట్ సరసీవాసో హ్యక్షయ్యనిధికోశకృత్ || ౧౪౧ ||

స్వామితీర్థకృతావాసః స్వామిధ్యేయో హ్యధోక్షజః |

వరాహాద్యష్టతీర్థాభిసేవితాంఘ్రిసరోరుహః || ౧౪౨ ||

పాండుతీర్థాభిషిక్తాంగో యుధిష్ఠిరవరప్రదః |

భీమాంతఃకరణారూఢః శ్వేతవాహనసఖ్యవాన్ || ౧౪౩ ||

నకులాభయదో మాద్రీసహదేవాభివందితః |

కృష్ణాశపథసంధాతా కుంతీస్తుతిరతో దమీ || ౧౪౪ ||

నారదాదిమునిస్తుత్యో నిత్యకర్మపరాయణః |

దర్శితావ్యక్తరూపశ్చ వీణానాదప్రమోదితః || ౧౪౫ ||

షట్కోటితీర్థచర్యావాన్ దేవతీర్థకృతాశ్రమః |

బిల్వామలజలస్నాయీ సరస్వత్యంబుసేవితః || ౧౪౬ ||

తుంబురూదకసంస్పర్శజనచిత్తతమోఽపహః |

మత్స్యవామనకూర్మాదితీర్థరాజః పురాణభృత్ || ౧౪౭ ||

చక్రధ్యేయపదాంభోజః శంఖపూజితపాదుకః |

రామతీర్థవిహారీ చ బలభద్రప్రతిష్ఠితః || ౧౪౮ ||

జామదగ్న్యసరస్తీర్థజలసేచనతర్పితః |

పాపాపహారికీలాలసుస్నాతాఘవినాశనః || ౧౪౯ ||

నభోగంగాభిషిక్తశ్చ నాగతీర్థాభిషేకవాన్ |

కుమారధారాతీర్థస్థో వటువేషః సుమేఖలః || ౧౫౦ ||

వృద్ధస్య సుకుమారత్వప్రదః సౌందర్యవాన్ సుఖీ |

ప్రియంవదో మహాకుక్షిరిక్ష్వాకుకులనందనః || ౧౫౧ ||

నీలగోక్షీరధారాభూర్వరాహాచలనాయకః |

భరద్వాజప్రతిష్ఠావాన్ బృహస్పతివిభావితః || ౧౫౨ ||

అంజనాకృతపూజావాన్ ఆంజనేయకరార్చితః |

అంజనాద్రినివాసశ్చ ముంజకేశః పురందరః || ౧౫౩ ||

కిన్నరద్వంద్వసంబంధిబంధమోక్షప్రదాయకః |

వైఖానసమఖారంభో వృషజ్ఞేయో వృషాచలః || ౧౫౪ ||

వృషకాయప్రభేత్తా చ క్రీడనాచారసంభ్రమః |

సౌవర్చలేయవిన్యస్తరాజ్యో నారాయణ ప్రియః || ౧౫౫ ||

దుర్మేధోభంజకః ప్రాజ్ఞో బ్రహ్మోత్సవమహోత్సుకః |

భద్రాసురశిరశ్చేతా భద్రక్షేత్రీ సుభద్రవాన్ || ౧౫౬ ||

మృగయాఽక్షీణసన్నాహః శంఖరాజన్యతుష్టిదః |

స్థాణుస్థో వైనతేయాంగభావితో హ్యశరీరవాన్ || ౧౫౭ ||

భోగీంద్రభోగసంస్థానో బ్రహ్మాదిగణసేవితః |

సహస్రార్కచ్ఛటాభాస్వద్యిమానంతఃస్థితో గుణీ || ౧౫౮ ||

విష్వక్సేనకృతస్తోత్రః సనందనవరీవృతాః |

జాహ్నవ్యాదినదీసేవ్యః సురేశాద్యభివందితః || ౧౫౯ ||

సురాంగనానృత్యపరో గంధర్వోద్గాయనప్రియః |

రాకేందుసంకాశనఖః కోమలాంఘ్రిసరోరుహః || ౧౬౦ ||

కచ్ఛపప్రపదః కుందగుల్ఫకః స్వచ్ఛకూర్పరః |

మేదురస్వర్ణవస్త్రాఢ్యకటిదేశస్థమేఖలః || ౧౬౧ ||

ప్రోల్లసచ్ఛురికాభాస్వత్కటిదేశః శుభంకరః |

అనంతపద్మజస్థాననాభిర్మౌక్తికమాలికః || ౧౬౨ ||

మందారచాంపేయమాలీ రత్నాభరణసంభృతః |

లంబయజ్ఞోపవీతీ చ చంద్రశ్రీఖండలేపవాన్ || ౧౬౩ ||

వరదోఽభయదశ్చక్రీ శంఖీ కౌస్తుభదీప్తిమాన్ |

శ్రీవత్సాంకితవక్షస్కో లక్ష్మీసంశ్రితహృత్తటః || ౧౬౪ ||

నీలోత్పల నిభాకారః శోణాంభోజసమాననః |

కోటిమన్మథలావణ్యశ్చంద్రికాస్మితపూరితః || ౧౬౫ ||

సుధాస్వచ్ఛోర్ధ్వపుండ్రశ్చ కస్తూరీతిలకాంచితః |

పుండరీకేక్షణః స్వచ్ఛో మౌలిశోభావిరాజితః || ౧౬౬ ||

పద్మస్థః పద్మనాభశ్చ సోమమండలగో బుధః |

వహ్నిమండలగః సూర్యః సూర్యమండలసంస్థితః || ౧౬౭ ||

శ్రీపతిర్భూమిజానిశ్చ విమలాద్యభిసంవృతః |

జగత్కుటుంబజనితా రక్షకః కామితప్రదః || ౧౬౮ ||

అవస్థాత్రయయంతా చ విశ్వతేజస్స్వరూపవాన్ |

జ్ఞప్తిర్జ్ఞేయో జ్ఞానగమ్యో జ్ఞానాతీతః సురాతిగః || ౧౬౯ ||

బ్రహ్మాండాంతర్బహిర్వ్యాప్తో వేంకటాద్రిగదాధరః |

శ్రీ వేంకటాద్రిగదాధర ఓం నమః ఇతి ||

ఏవం శ్రీవేంకటేశస్య కీర్తితం పరమాద్భుతమ్ || ౧౭౦ ||

నామ్నాం సహస్రం సంశ్రావ్యం పవిత్రం పుణ్యవర్ధనమ్ |

శ్రవణాత్సర్వదోషఘ్నం రోగఘ్నం మృత్యునాశనమ్ || ౧౭౧ ||

దారిద్ర్యభేదనం ధర్మ్యం సర్వైశ్వర్యఫలప్రదమ్ |

కాలాహివిషవిచ్ఛేదిజ్వరాపస్మారభంజనమ్ || ౧౭౨ ||

శత్రుక్షయకరం రాజగ్రహపీడానివారణమ్ |

బ్రహ్మరాక్షసకూష్మాండభేతాలభయభంజనమ్ || ౧౭౩ ||

విద్యాభిలాషీ విద్యావాన్ ధనార్థీ ధనవాన్ భవేత్ |

అనంతకల్పజీవీ స్యాదాయుష్కామో మహాయశాః || ౧౭౪ ||

పుత్రార్థీ సుగుణాన్పుత్రాన్ లభేతాఽఽయుష్మతస్తతః |

సంగ్రామే శత్రువిజయీ సభాయాం ప్రతివాదిజిత్ || ౧౭౫ ||

దివ్యైర్నామభిరేభిస్తు తులసీపూజనాత్సకృత్ |

వైకుంఠవాసీ భగవత్సదృశో విష్ణుసన్నిధౌ || ౧౭౬ ||

కహ్లారపూజనాన్మాసాత్ ద్వితీయ ఇవ యక్షరాట్ |

నీలోత్పలార్చనాత్సర్వరాజపూజ్యః సదా భవేత్ || ౧౭౭ ||

హృత్సంస్థితైర్నామభిస్తు భూయాద్దృగ్విషయో హరిః |

వాంఛితార్థం తదా దత్వా వైకుంఠం చ ప్రయచ్ఛతి || ౧౭౮ ||

త్రిసంధ్యం యో జపేన్నిత్యం సంపూజ్య విధినా విభుమ్ |

త్రివారం పంచవారం వా ప్రత్యహం క్రమశో యమీ || ౧౭౯ ||

మాసాదలక్ష్మీనాశః స్యాత్ ద్విమాసాత్ స్యాన్నరేంద్రతా |

త్రిమాసాన్మహదైశ్వర్యం తతస్సంభాషణం భవేత్ || ౧౮౦ ||

మాసం పఠన్న్యూనకర్మమూర్తిం చ సమవాప్నుయాత్ |

మార్గభ్రష్టశ్చ సన్మార్గం గతస్వః స్వం స్వకీయకమ్ || ౧౮౧ ||

చాంచల్యచిత్తోఽచాంచల్యం మనస్స్వాస్థ్యం చ గచ్ఛతి |

ఆయురారోగ్యమైశ్వర్యం జ్ఞానం మోక్షం చ విందతి || ౧౮౨ ||

సర్వాన్కామానవాప్నోతి శాశ్వతం చ పదం తథా |

సత్యం సత్యం పునస్సత్యం సత్యం సత్యం న సంశయః || ౧౮౩ ||

శ్రీ బ్రహ్మాండపురాణే వసిష్ఠనారదసంవాదే శ్రీవేంకటాచలమాహాత్మ్యే శ్రీ వేంకటేశ సహస్రనామ స్తోత్రాధ్యాయః సమాప్తః ||