Sri Narasimha Mantra Raja Pada Stotram – శ్రీ నృసింహ మంత్రరాజపద స్తోత్రం

పార్వత్యువాచ –

మన్త్రాణాం పరమం మన్త్రం గుహ్యానాం గుహ్యమేవ చ |

బ్రూహి మే నారసింహస్య తత్త్వం మన్త్రస్య దుర్లభమ్ ||

శంకర ఉవాచ –

వృత్తోత్ఫుల్లవిశాలాక్షం విపక్షక్షయదీక్షితం |

నినాదత్రస్తవిశ్వాణ్డం విష్ణుముగ్రం నమామ్యహమ్ || ౧ ||

సర్వైరవధ్యతాం ప్రాప్తం సబలౌఘం దితేస్సుతం |

నఖాగ్రైశ్శకలీచక్రేయస్తం వీరం నమామ్యహమ్ || ౨ ||

పాదావష్టబ్ధపాతాళం మూర్ధాఽఽవిష్టత్రివిష్టపం |

భుజప్రవిష్టాష్టదిశం మహావిష్ణుం నమామ్యహమ్ || ౩ ||

జ్యోతీంష్యర్కేన్దునక్షత్రజ్వలనాదీన్యనుక్రమాత్ |

జ్వలన్తి తేజసా యస్య తం జ్వలన్తం నమామ్యహమ్ || ౪ ||

సర్వేన్ద్రియైరపి వినా సర్వం సర్వత్ర సర్వదా |

జానాతి యో నమామ్యాద్యం తమహం సర్వతోముఖమ్ || ౫ ||

నరవత్సింహవచ్చైవ రూపం యస్య మహాత్మనః |

మహాసటం మహాదంష్ట్రం తం నృసింహం నమామ్యహమ్ || ౬ ||

యన్నామస్మరణాద్భీతా భూతవేతాళరాక్షసాః |

రోగాద్యాశ్చ ప్రణశ్యన్తి భీషణం తం నమామ్యహమ్ || ౭ ||

సర్వేఽపి యం సమాశ్రిత్య సకలం భద్రమశ్నుతే |

శ్రియా చ భద్రయా జుష్టో యస్తం భద్రం నమామ్యహమ్ || ౮ ||

సాక్షాత్స్వకాలే సమ్ప్రాప్తం మృత్యుం శత్రుగణానపి |

భక్తానాం నాశయేద్యస్తు మృత్యుమృత్యుం నమామ్యహమ్ || ౯ ||

నమస్కారాత్మకం యస్మై విధాయాత్మనివేదనం |

త్యక్తదుఃఖోఽఖిలాన్కామానశ్నుతే తం నమామ్యహమ్ || ౧౦ ||

దాసభూతాస్స్వతస్సర్వే హ్యాత్మానః పరమాత్మనః |

అతోఽహమపి తే దాస ఇతి మత్వా నమామ్యహమ్ || ౧౧ ||

శంకరేణాదరాత్ప్రోక్తం పదానాం తత్త్వముత్తమం |

త్రిసన్ధ్యం యో జపేత్తస్య విద్యాఽఽయుః శ్రీశ్చ వర్ధతే || ౧౨ ||

ఇతి శ్రీ శంకరకృత శ్రీనృసింహమంత్రరాజపదస్తోత్రమ్ |