Sri Dattatreya Shanti Stotram – శ్రీ దత్తాత్రేయ శాంతి స్తోత్రం

నమస్తే భగవన్దేవ దత్తాత్రేయ జగత్ప్రభో |

సర్వబాధాప్రశమనం కురు శాంతిం ప్రయచ్ఛమే || ౧ ||

అనసూయాసుత శ్రీశః జనపాతకనాశన |

దిగంబర నమో నిత్యం తుభ్యం మే వరదో భవ || ౨ ||

భూతప్రేతపిశాచాద్యాః యస్య స్మరణ మాత్రతః |

దూరాదేవ పలాయంతే దత్తాత్రేయం నమామి తమ్ || ౩ ||

యన్నామస్మరణాద్దైన్యం పాపం తాపం చ నశ్యతి |

భీతర్గ్రహార్తి దుస్స్వప్నం దత్తాత్రేయం నమామి తమ్ || ౪ ||

దద్రుస్ఫోటక కుష్టాది మహామారీ విషూచికాః |

నశ్యంత్యన్యేపి రోగాశ్చ దత్తాత్రేయం నమామి తమ్ || ౫ ||

సంగజా దేశకాలోత్థాః తాపత్రయ సముద్దితాః |

శామ్యంతి యత్స్మరణతో దత్తాత్రేయం నమామి తమ్ || ౬ ||

సర్పవృశ్చిక దష్టాణాం విషార్తానాం శరీరిణామ్ |

యన్నామ శాంతిదం శీఘ్రం దత్తాత్రేయం నమామి తమ్ || ౭ ||

త్రివిధోత్పాతశమనం వివిధారిష్టనాశనమ్ |

యన్నామ క్రూరభీతిఘ్నం దత్తాత్రేయం నమామి తమ్ || ౮ ||

వైర్యాదికృతమంత్రాది ప్రయోగా యస్య కీర్తనాత్ |

నశ్యంతి దేహబాధాశ్చ దత్తాత్రేయం నమామి తమ్ || ౯ ||

యచ్ఛిష్యస్మరణాత్సద్యో గతనష్టాది లభ్యతే |

యశ్చమే సర్వతస్త్రాతా దత్తాత్రేయం నమామి తమ్ || ౧౦ ||

జయ లాభ యశః కామ దాతుర్దత్తస్య యః స్తవమ్ |

భోగమోక్షప్రదస్యేమం పఠేద్దత్తప్రియో భవేత్ || ౧౧ ||

దేవనాథగురో స్వామిన్ దేశిక స్వాత్మనాయక |

త్రాహి త్రాహి కృపాసింధో పూర్ణపారాయణం కురు ||

ఇతి శ్రీమత్పరమహంస పరివ్రాజకాచార్యవర్య శ్రీవాసుదేవానంద సరస్వతీవిరచిత దత్తాత్రేయశాంతిస్తోత్రం సంపూర్ణమ్ |

దత్తాత్రేయ శాంతిస్తోత్ర పారాయణేన భగవాన్ సర్వాత్మకం సర్వం శ్రీదత్తాత్రేయ పరబ్రహ్మార్పణమస్తు |