Sri Anjaneya Navaratna Mala Stotram – శ్రీ ఆంజనేయ నవరత్నమాలా స్తోత్రం

మాణిక్యం

తతో రావణనీతాయాః సీతాయాః శత్రుకర్శనః |

ఇయేష పదమన్వేష్టుం చారణాచరితే పథి || ౧ ||

ముత్యం

యస్య త్వేతాని చత్వారి వానరేంద్ర యథా తవ |

స్మృతిర్మతిర్ధృతిర్దాక్ష్యం స కర్మసు న సీదతి || ౨ ||

ప్రవాలం

అనిర్వేదః శ్రియో మూలం అనిర్వేదః పరం సుఖమ్ |

అనిర్వేదో హి సతతం సర్వార్థేషు ప్రవర్తకః || ౩ ||

మరకతం

నమోఽస్తు రామాయ సలక్ష్మణాయ

దేవ్యై చ తస్యై జనకాత్మజాయై |

నమోఽస్తు రుద్రేంద్రయమానిలేభ్యః

నమోఽస్తు చంద్రార్కమరుద్గణేభ్యః || ౪ ||

పుష్యరాగం

ప్రియాన్న సంభవేద్దుఃఖం అప్రియాదధికం భయమ్ |

తాభ్యాం హి యే వియుజ్యంతే నమస్తేషాం మహాత్మనామ్ || ౫ ||

హీరకం

రామః కమలపత్రాక్షః సర్వసత్త్వమనోహరః |

రూపదాక్షిణ్యసంపన్నః ప్రసూతో జనకాత్మజే || ౬ ||

ఇంద్రనీలం

జయత్యతిబలో రామో లక్ష్మణశ్చ మహాబలః |

రాజా జయతి సుగ్రీవో రాఘవేణాభిపాలితః |

దాసోఽహం కోసలేంద్రస్య రామస్యాక్లిష్టకర్మణః |

హనుమాన్ శత్రుసైన్యానాం నిహంతా మారుతాత్మజః || ౭ ||

గోమేధికం

యద్యస్తి పతిశుశ్రూషా యద్యస్తి చరితం తపః |

యది వాస్త్యేకపత్నీత్వం శీతో భవ హనూమతః || ౮ ||

వైడూర్యం

నివృత్తవనవాసం తం త్వయా సార్ధమరిందమమ్ |

అభిషిక్తమయోధ్యాయాం క్షిప్రం ద్రక్ష్యసి రాఘవమ్ || ౯ ||

ఇతి శ్రీ ఆంజనేయ నవరత్నమాలా స్తోత్రమ్ |