Dvatrimsat Ganapathi Dhyana Slokah – ద్వాత్రింశద్గణపతి ధ్యాన శ్లోకాః

 1. శ్రీ బాలగణపతిః

కరస్థ కదలీచూతపనసేక్షుకమోదకమ్ |

బాలసూర్యమిమం వందే దేవం బాలగణాధిపమ్ || ౧ ||

2. శ్రీ తరుణగణపతిః

పాశాంకుశాపూపకపిత్థజంబూ-

-స్వదంతశాలీక్షుమపి స్వహస్తైః |

ధత్తే సదా యస్తరుణారుణాభః

పాయాత్ స యుష్మాంస్తరుణో గణేశః || ౨ ||

3. శ్రీ భక్తగణపతిః

నారికేలామ్రకదలీగుడపాయసధారిణమ్ |

శరచ్చంద్రాభవపుషం భజే భక్తగణాధిపమ్ || ౩ ||

4. శ్రీ వీరగణపతిః

బేతాలశక్తిశరకార్ముకచక్రఖడ్గ-

-ఖట్వాంగముద్గరగదాంకుశనాగపాశాన్ |

శూలం చ కుంతపరశుం ధ్వజముద్వహంతం

వీరం గణేశమరుణం సతతం స్మరామి || ౪ ||

5. శ్రీ శక్తిగణపతిః

ఆలింగ్య దేవీం హరితాంగయష్టిం

పరస్పరాశ్లిష్టకటిప్రదేశమ్ |

సంధ్యారుణం పాశసృణీ వహన్తం

భయాపహం శక్తిగణేశమీడే || ౫ ||

6. శ్రీ ద్విజగణపతిః

యం పుస్తకాక్ష గుణదండకమండలు శ్రీ-

-విద్యోతమానకరభూషణమిందువర్ణమ్ |

స్తంబేరమాననచతుష్టయశోభమానం

త్వాం యః స్మరేత్ ద్విజగణాధిపతే స ధన్యః || ౬ ||

7. శ్రీ సిద్ధగణపతిః

పక్వచూతఫలపుష్పమంజరీ-

-రిక్షుదండతిలమోదకైః సహ |

ఉద్వహన్ పరశుమస్తు తే నమః

శ్రీసమృద్ధియుత హేమపింగళః || ౭ ||

8. శ్రీ ఉచ్ఛిష్టగణపతిః

నీలాబ్జదాడిమీవీణాశాలీగుంజాక్షసూత్రకమ్ |

దధదుచ్ఛిష్టనామాయం గణేశః పాతు మేచకః || ౮ ||

9. శ్రీ విఘ్నగణపతిః

శంఖేక్షుచాపకుసుమేషుకుఠారపాశ-

-చక్రస్వదంతసృణిమంజరికాశరౌఘైః |

పాణిశ్రితైః పరిసమీహితభూషణశ్రీ-

-ర్విఘ్నేశ్వరో విజయతే తపనీయగౌరః || ౯ ||

10. శ్రీ క్షిప్రగణపతిః

దంతకల్పలతాపాశరత్నకుంభాంకుశోజ్జ్వలమ్ |

బంధూకకమనీయాభం ధ్యాయేత్ క్షిప్రగణాధిపమ్ || ౧౦ ||

11. శ్రీ హేరంబగణపతిః

అభయవరదహస్తః పాశదంతాక్షమాలా-

సృణిపరశు దధానో ముద్గరం మోదకం చ |

ఫలమధిగతసింహః పంచమాతంగవక్త్రో

గణపతిరతిగౌరః పాతు హేరంబనామా || ౧౧ ||

12. శ్రీ లక్ష్మీగణపతిః

బిభ్రాణః శుకబీజపూరకమిలన్మాణిక్యకుంభాకుశాన్

పాశం కల్పలతాం చ ఖడ్గవిలసజ్జ్యోతిస్సుధానిర్ఝరః |

శ్యామేనాత్తసరోరుహేణ సహితం దేవీద్వయం చాంతికే

గౌరాంగో వరదానహస్తసహితో లక్ష్మీగణేశోఽవతాత్ || ౧౨ ||

13. శ్రీ మహాగణపతిః

హస్తీంద్రాననమిందుచూడమరుణచ్ఛాయం త్రినేత్రం రసా-

-దాశ్లిష్టం ప్రియయా సపద్మకరయా స్వాంకస్థయా సంతతమ్ |

బీజాపూరగదేక్షుకార్ముకలసచ్ఛక్రాబ్జపాశోత్పల-

వ్రీహ్యగ్రస్వవిషాణరత్నకలశాన్ హస్తైర్వహంతం భజే || ౧౩ ||

14. శ్రీ విజయగణపతిః

పాశాంకుశస్వదంతామ్రఫలవానాఖువాహనః |

విఘ్నం నిహంతు నః సర్వం రక్తవర్ణో వినాయకః || ౧౪ ||

15. శ్రీ నృత్తగణపతిః

పాశాంకుశాపూపకుఠారదంత-

-చంచత్కరాక్లుప్తవరాంగులీకమ్ |

పీతప్రభం కల్పతరోరధస్థం

భజామి నృత్తోపపదం గణేశమ్ || ౧౫ ||

16. శ్రీ ఊర్ధ్వగణపతిః

కల్హారశాలికమలేక్షుకచాపబాణ-

దంతప్రరోహకగదీ కనకోజ్జ్వలాంగః |

ఆలింగనోద్యతకరో హరితాంగయష్ట్యా

దేవ్యా కరోతు శుభమూర్ధ్వగణాధిపో మే || ౧౬ ||

17. శ్రీ ఏకాక్షరగణపతిః

రక్తో రక్తాంగరాగాంకుశకుసుమయుతస్తుందిలశ్చంద్రమౌళిః

నేత్రైర్యుక్తస్త్రిభిర్వామనకరచరణో బీజపూరం దధానః |

హస్తాగ్రాక్లప్త పాశాంకుశరదవరదో నాగవక్త్రోఽహిభూషో

దేవః పద్మాసనస్థో భవతు సుఖకరో భూతయే విఘ్నరాజః || ౧౭ ||

18. శ్రీ వరగణపతిః

సిందూరాభమిభాననం త్రినయనం హస్తే చ పాశాంకుశౌ

బిభ్రాణం మధుమత్కపాలమనిశం సాధ్విందుమౌళిం భజే |

పుష్ట్యాశ్లిష్టతనుం ధ్వజాగ్రకరయా పద్మోల్లసద్ధస్తయా

తద్యోన్యాహిత పాణిమాత్తవసుమత్పాత్రోల్లసత్పుష్కరమ్ || ౧౮ ||

19. శ్రీ త్ర్యక్షరగణపతిః

గజేంద్రవదనం సాక్షాచ్చలత్కర్ణసుచామరం

హేమవర్ణం చతుర్బాహుం పాశాంకుశధరం వరమ్ |

స్వదంతం దక్షిణే హస్తే సవ్యే త్వామ్రపలం తథా

పుష్కరే మోదకం చైవ ధారయంతమనుస్మరేత్ || ౧౯ ||

20. శ్రీ క్షిప్రప్రసాదగణపతిః

ధృతపాశాంకుశకల్పలతా స్వదంతశ్చ బీజపూరయుతః

శశిశకలకలితమౌళిస్త్రిలోచనోఽరుణశ్చ గజవదనః |

భాసురభూషణదీప్తో బృహదుదరః పద్మవిష్టరోల్లసితః

విఘ్నపయోధరపవనః కరధృతకమలః సదాస్తు మే భూత్యై || ౨౦ ||

21. శ్రీ హరిద్రాగణపతిః

హరిద్రాభం చతుర్బాహుం హరిద్రావదనం ప్రభుమ్

పాశాంకుశధరం దేవం మోదకం దంతమేవ చ |

భక్తాభయప్రదాతారం వందే విఘ్నవినాశనమ్ || ౨౧ ||

22. శ్రీ ఏకదంతగణపతిః

లంబోదరం శ్యామతనుం గణేశం

కుఠారమక్షస్రజమూర్ధ్వగాత్రమ్ |

సలడ్డుకం దంతమధః కరాభ్యాం

వామేతరాభ్యాం చ దధానమీడే || ౨౨ ||

23. శ్రీ సృష్టిగణపతిః

పాశాంకుశస్వదంతామ్రఫలవానాఖువాహనః |

విఘ్నం నిహంతు నః శోణః సృష్టిదక్షో వినాయకః || ౨౩ ||

24. శ్రీ ఉద్దండగణపతిః

కల్హారాంబుజబీజపూరకగదాదంతేక్షుచాపం సుమం

బిభ్రాణో మణికుంభశాలికలశం పాశం సృణిం చాబ్జకమ్ |

గౌరాంగ్యా రుచిరారవిందకరయా దేవ్యా సమాలింగతః

శోణాంగః శుభమాతనోతు భజతాముద్దండవిఘ్నేశ్వరః || ౨౪ ||

25. శ్రీ ఋణమోచక గణపతిః

పాశాంకుశౌ దంతజంబు దధానః స్ఫాటికప్రభః |

రక్తాంశుకో గణపతిర్ముదే స్యాదృణమోచకః || ౨౫ ||

26. శ్రీ ఢుంఢిగణపతిః

అక్షమాలాం కుఠారం చ రత్నపాత్రం స్వదంతకమ్ |

ధత్తే కరైర్విఘ్నరాజో ఢుంఢినామా ముదేఽస్తు నః || ౨౬ ||

27. శ్రీ ద్విముఖగణపతిః

స్వదంతపాశాంకుశరత్నపాత్రం

కరైర్దధానో హరినీలగాత్రః |

రక్తాంశుకో రత్నకిరీటమాలీ

భూత్యై సదా మే ద్విముఖో గణేశః || ౨౭ ||

28. శ్రీ త్రిముఖగణపతిః

శ్రీమత్తీక్ష్ణశిఖాంకుశాక్షవరదాన్ దక్షే దధానః కరైః

పాశం చామృతపూర్ణకుంభమభయం వామే దధానో ముదా |

పీఠే స్వర్ణమయారవిందవిలసత్సత్కర్ణికాభాసురే

స్వాసీనస్త్రిముఖః పలాశరుచిరో నాగాననః పాతు నః || ౨౮ ||

29. శ్రీ సింహగణపతిః

వీణాం కల్పలతామరిం చ వరదం దక్షే విదత్తే కరై-

-ర్వామే తామరసం చ రత్నకలశం సన్మంజరీం చాభయమ్ |

శుండాదండలసన్మృగేంద్రవదనః శంఖేందుగౌరః శుభో

దీవ్యద్రత్ననిభాంశుకో గణపతిః పాయాదపాయత్ స నః || ౨౯ ||

30. శ్రీ యోగగణపతిః

యోగారూఢో యోగపట్టాభిరామో

బాలార్కాభశ్చేంద్రనీలాంశుకాఢ్యః |

పాశేక్ష్వక్షాన్ యోగదండం దధానో

పాయాన్నిత్యం యోగవిఘ్నేశ్వరో నః || ౩౦ ||

31. శ్రీ దుర్గాగణపతిః

తప్తకాంచనసంకాశశ్చాష్టహస్తో మహత్తనుః

దీప్తాంకుశం శరం చాక్షం దంతు దక్షే వహన్ కరైః |

వామే పాశం కార్ముకం చ లతాం జంబు దధత్కరైః

రక్తాంశుకః సదా భూయాద్దుర్గాగణపతిర్ముదే || ౩౧ ||

32. శ్రీ సంకటహరగణపతిః

బాలార్కారుణకాంతిర్వామే బాలాం వహన్నంకే

లసదిందీవరహస్తాం గౌరాంగీం రత్నశోభాఢ్యామ్ |

దక్షేఽంకుశవరదానం వామే పాశం చ పాయసం పాత్రం

నీలాంశుకలసమానః పీఠే పద్మారుణే తిష్ఠన్ || ౩౨ ||

సంకటహరణః పాయాత్ సంకటపూగాద్గజాననో నిత్యమ్ |

శ్రీ వల్లభగణపతి ధ్యానమ్ ––

బీజాపూర గదేక్షుకార్ముకభుజాచక్రాబ్జ పాశోత్పల

వ్రీహ్యగ్రస్వవిషాణ రత్నకలశ ప్రోద్యత్కరాంభోరుహః |

ధ్యేయో వల్లభయా చ పద్మకరయాశ్లిష్టో జ్వలద్భూషయా

విశ్వోత్పత్తివినాశసంస్థితికరో విఘ్నో విశిష్టార్థదః ||

శ్రీ సిద్ధిదేవీ ధ్యానమ్ ––

పీతవర్ణాం ద్వినేత్రాం తామేకవక్త్రాంబుజద్వయాం

నవరత్నకిరీటాం చ పీతాంబరసుధారిణీమ్ |

వామహస్తే మహాపద్మం దక్షే లంబకరాన్వితాం

జాజీచంపకమాలాం చ త్రిభంగీం లలితాంగికామ్ ||

గణేశదక్షిణే భాగే గురుః సిద్ధిం తు భావయేత్ ||

శ్రీ బుద్ధిదేవీ ధ్యానమ్ ––

ద్విహస్తాం చ ద్వినేత్రాం తామేకవక్త్రాం త్రిభంగికాం

ముక్తామణికిరీటాం చ దక్షే హస్తే మహోత్పలమ్ |

వామే ప్రలంబహస్తాం చ దివ్యాంబరసుధారిణీం

శ్యామవర్ణనిభాం భాస్వత్సర్వాభరణభూషితామ్ ||

పారిజాతోత్పలామాల్యాం గణేశో వామపార్శ్వకే

ధ్యాత్వా బుద్ధిం సురూపాం సమర్చయేద్దేశికోత్తమః ||