Daya Satakam – దయాశతకమ్

ప్రపద్యే తం గిరిం ప్రాయః శ్రీనివాసానుకమ్పయా |

ఇక్షుసారస్రవన్త్యేవ యన్మూర్త్యా శర్కరాయితమ్ || ౧ ||

విగాహే తీర్థబహులాం శీతలాం గురుసన్తతిమ్ |

శ్రీనివాసదయామ్భోధిపరీవాహపరమ్పరామ్ || ౨ ||

కృతినః కమలావాసకారుణ్యైకాన్తినో భజే |

ధత్తే యత్సూక్తిరూపేణ త్రివేదీ సర్వయోగ్యతామ్ || ౩ ||

పరాశరముఖాన్వన్దే భగీరథనయే స్థితాన్ |

కమలాకాన్తకారుణ్యగఙ్గాప్లావితమద్విధాన్ || ౪ ||

అశేషవిఘ్నశమనమనీకేశ్వరమాశ్రయే |

శ్రీమతః కరుణామ్భోధౌ శిక్షాస్రోత ఇవోత్థితమ్ || ౫ ||

సమస్తజననీం వన్దే చైతన్యస్తన్యదాయినీమ్ |

శ్రేయసీం శ్రీనివాసస్య కరుణామివ రూపిణీమ్ || ౬ ||

వన్దే వృషగిరీశస్య మహిషీం విశ్వధారిణీమ్ |

తత్కృపాప్రతిఘాతానాం క్షమయా వారణం యయా || ౭ ||

నిశామయతు మాం నీళా యద్భోగపటలైర్ధ్రువమ్ |

భావితం శ్రీనివాసస్య భక్తదోషేష్వదర్శనమ్ || ౮ ||

కమప్యనవధిం వన్దే కరుణావరుణాలయమ్ |

వృషశైలతటస్థానాం స్వయం వ్యక్తిముపాగతమ్ || ౯ ||

అకిఞ్చననిధిం సూతిమపవర్గత్రివర్గయోః |

అఞ్జనాద్రీశ్వరదయామభిష్టౌమి నిరఞ్జనామ్ || ౧౦ ||

అనుచరశక్త్యాదిగుణామగ్రేసరబోధవిరచితాలోకామ్ |

స్వాధీనవృషగిరీశాం స్వయం ప్రభూతాం ప్రమాణయామి దయామ్ || ౧౧ ||

అపి నిఖిలలోకసుచరితముష్టిన్ధయదురితమూర్ఛనాజుష్టమ్ |

సఞ్జీవయతు దయే మామఞ్జనగిరినాథరఞ్జనీ భవతీ || ౧౨ ||

భగవతి దయే భవత్యా వృషగిరినాథే సమాప్లుతే తుఙ్గే |

అప్రతిఘమజ్జనానాం హస్తాలమ్బో మదాగసాం మృగ్యః || ౧౩ ||

కృపణజనకల్పలతికాం కృతాపరాధస్య నిష్క్రియామాద్యామ్ |

వృషగిరినాథదయే త్వాం విదన్తి సంసారతారిణీం విబుధాః || ౧౪ ||

వృషగిరిగృహమేధిగుణా బోధబలైశ్వర్యవీర్యశక్తిముఖాః |

దోషా భవేయురేతే యది నామ దయే త్వయా వినాభూతాః || ౧౫ ||

ఆసృష్టి సన్తతానామపరాధానాం నిరోధినీం జగతః |

పద్మాసహాయకరుణే ప్రతిసఞ్చరకేళిమాచరసి || ౧౬ ||

అచిదవిశిష్టాన్ప్రలయే జన్తూనవలోక్య జాతనిర్వేదా |

కరణకలేబరయోగం వితరసి వృషశైలనాథకరుణే త్వమ్ || ౧౭ ||

అనుగుణదశార్పితేన శ్రీధరకరుణే సమాహితస్నేహా |

శమయసి తమః ప్రజానాం శాస్త్రమయేన స్థిరప్రదీపేన || ౧౮ ||

రుఢా వృషాచలపతేః పాదే ముఖకాన్తిపత్రలచ్ఛాయా |

కరుణే సుఖయసి వినతాన్కటాక్షవిటపైః కరాపచేయఫలైః || ౧౯ ||

నయనే వృషాచలేన్దోస్తారామైత్రీం దధానయా కరుణే |

దృష్టస్త్వయైవ జనిమానపవర్గమకృష్టపచ్యమనుభవతి || ౨౦ ||

సమయోపనతైస్తవ ప్రవాహైరనుకమ్పే కృతసమ్ప్లవా ధరిత్రీ |

శరణాగతసస్యమాలినీయం వృషశైలేశకృషీవలం ధినోతి || ౨౧ ||

కలశోదధిసమ్పదో భవత్యాః కరుణే సన్మతిమన్థసంస్కృతాయాః |

అమృతాంశమవైమి దివ్యదేహం మృతసఞ్జీవనమఞ్జనాచలేన్దోః || ౨౨ ||

జలధేరివ శీతతా దయే త్వం వృషశైలాధిపతేస్స్వభావభూతా |

ప్రలయారభటీంనటీం తదీక్షాం ప్రసభం గ్రాహయసి ప్రసక్తిలాస్యమ్ || ౨౩ ||

ప్రణతప్రతికూలమూలఘాతీ ప్రతిఘః కోఽపి వృషాచలేశ్వరస్య |

కలమే యవసాపచాయనీత్యా కరుణే కిఙ్కరతాం తవోపయాతి || ౨౪ ||

అబహిష్కృతనిగ్రహాన్విదన్తః కమలాకాన్తగుణాన్స్వతన్త్రతాదీన్ |

అవికల్పమనుగ్రహం దుహానాం భవతీమేవ దయే భజన్తి సన్తః || ౨౫ ||

కమలానిలయస్త్వయా దయాలుః కరుణే నిష్కరుణా నిరూపణే త్వమ్ |

అత ఏవ హి తావకాశ్రితానాం దురితానాం భవతి త్వదేవ భీతిః || ౨౬ ||

అతిలఙ్ఘితశాసనేష్వభీక్ష్ణం వృషశైలాధిపతిర్విజృమ్భితోష్మా |

పునరేవ దయే క్షమానిదానైర్భవతీమాద్రియతే భవత్యధీనైః || ౨౭ ||

కరుణే దురితేషు మామకేషు ప్రతికారాన్తరదుర్జయేషు ఖిన్నః |

కవచాయితయా త్వయైవ శార్ఙ్గీ విజయస్థానముపాశ్రితో వృషాద్రిమ్ || ౨౮ ||

మయి తిష్ఠతి దుష్కృతాం ప్రధానే మితదోషానితరాన్విచిన్వతీ త్వమ్ |

అపరాధగణైరపూర్ణకుక్షిః కమలాకాన్తదయే కథం భవిత్రీ || ౨౯ ||

అహమస్మ్యపరాధచక్రవర్తీ కరుణే త్వం చ గుణేషు సార్వభౌమీ |

విదుషీ స్థితిమీదృశీం స్వయం మాం వృషశైలేశ్వరపాదసాత్కురు త్వమ్ || ౩౦ ||

అశిథిలకరణేఽస్మిన్నక్షతశ్వాసవృత్తౌ

వపుషి గమనయోగ్యే వాసమాసాదయేయమ్ |

వృషగిరికటకేషు వ్యఞ్జయత్సు ప్రతీతై-

ర్మధుమథనదయే త్వాం వారిధారావిశేషైః || ౩౧ ||

అవిదితనిజయోగక్షేమమాత్మానభిజ్ఞం

గుణలవరహితం మాం గోప్తుకామా దయే త్వమ్ |

పరవతి చతురైస్తే విభ్రమైశ్శ్రీనివాసే

బహుమతిమనపాయాం విన్దసి శ్రీధరణ్యోః || ౩౨ ||

ఫలవితరణదక్షం పక్షపాతానభిజ్ఞం

ప్రగుణమనువిధేయం ప్రాప్య పద్మాసహాయమ్ |

మహతి గుణసమాజే మానపూర్వం దయే త్వం

ప్రతివదసి యథార్హం పాప్మనాం మామకానామ్ || ౩౩ ||

అనుభవితుమఘౌఘం నాలమాగామికాలః

ప్రశమయితుమశేషం నిష్క్రియాభిర్న శక్యమ్ |

స్వయమితి హి దయే త్వం స్వీకృతశ్రీనివాసా

శిథిలితభవభీతిశ్శ్రేయసే జాయసే నః || ౩౪ ||

అవతరణవిశేషైరాత్మలీలాపదేశై-

రవమతిమనుకమ్పే మన్దచిత్తేషు విన్దన్ |

వృషభశిఖరినాథస్త్వన్నిదేశేన నూనం

భజతి చరణభాజాం భావినో జన్మభేదాన్ || ౩౫ ||

పరహితమనుకమ్పే భావయన్త్యాం భవత్యాం

స్థిరమనుపధి హార్దం శ్రీనివాసో దధానః |

లలితరుచిషు లక్ష్మీభూమినీలాసు నూనం

ప్రథయతి బహుమానం త్వత్ప్రతిచ్ఛన్దబుద్ధ్యా || ౩౬ ||

వృషగిరిసవిధేషు వ్యాజతో వాసభాజాం

దురితకలుషితానాం దూయమానా దయే త్వమ్ |

కరణవిలయకాలే కాన్దిశీకస్మృతీనాం

స్మరయసి బహులీలం మాధవం సావధానా || ౩౭ ||

దిశి దిశి గతివిద్భిర్దేశికైర్నీయమానా

స్థిరతరమనుకమ్పే స్త్యానలగ్నా గుణైస్త్వమ్ |

పరిగతవృషశైలం పారమారోపయన్తీ

భవజలధిగతానాం పోతపాత్రీ భవిత్రీ || ౩౮ ||

పరిమితఫలసఙ్గాత్ప్రాణినః కిమ్పచానా

నిగమవిపణిమధ్యే నిత్యముక్తానుషక్తమ్ |

ప్రసదనమనుకమ్పే ప్రాప్తవత్యాం భవత్యాం

వృషగిరిహరినీలం వ్యఞ్జితం నిర్విశన్తి || ౩౯ ||

త్వయి బహుమతిహీనశ్శ్రీనివాసానుకమ్పే

జగతి గతిమిహాన్యాం దేవి సమ్మన్యతే యః |

స ఖలు విబుధసిన్ధౌ సన్నికర్షే వహన్త్యాం

శమయతి మృగతృష్ణావీచికాభిః పిపాసామ్ || ౪౦ ||

ఆజ్ఞాం ఖ్యాతిం ధనమనుచరానాధిరాజ్యాదికం వా

కాలే దృష్ట్వా కమలవసతేరప్యకిఞ్చిత్కరాణి |

పద్మాకాన్తం ప్రణిహితవతీం పాలనేఽనన్యసాధ్యే

సారాభిజ్ఞా జగతి కృతినస్సంశ్రయన్తే దయే త్వామ్ || ౪౧ ||

ప్రాజాపత్యప్రభృతివిభవం ప్రేక్ష్య పర్యాయదుఃఖం

జన్మాకాఙ్క్షన్వృషగిరివనే జగ్ముషాం తస్థుషాం వా |

ఆశాసానాః కతిచన విభోః త్వత్పరిష్వఙ్గధన్యై-

రఙ్గీకారం క్షణమపి దయే హార్దతుఙ్గైరపాఙ్గైః || ౪౨ ||

నాభీపద్మస్ఫురణసుభగా నవ్యనీలోత్పలాభా

క్రీడాశైలం కమపి కరుణే వృణ్వతీ వేఙ్కటాఖ్యమ్ |

శీతా నిత్యం ప్రసదనవతీ శ్రద్ధధానావగాహ్యా

దివ్యా కాచిజ్జయతి మహతీ దీర్ఘికా తావకీనా || ౪౩ ||

యస్మిన్దృష్టే తదితరసుఖైర్గమ్యతే గోష్పదత్వం

సత్యం జ్ఞానం త్రిభిరవధిభిర్ముక్తమానన్దసిన్ధుమ్ |

త్వత్స్వీకారాత్తమిహ కృతినస్సూరిబృన్దానుభావ్యం

నిత్యాపూర్వం నిధిమివ దయే నిర్విశన్త్యఞ్జనాద్రౌ || ౪౪ ||

సారం లబ్ధ్వా కమపి మహతశ్శ్రీనివాసామ్బురాశేః

కాలే కాలే ఘనరసవతీ కాలికేవానుకమ్పే |

వ్యక్తోన్మేషా మృగపతిగిరౌ విశ్వమాప్యాయయన్తీ

శీలోపజ్ఞం క్షరతి భవతీ శీతలం సద్గుణౌఘమ్ || ౪౫ ||

భీమే నిత్యం భవజలనిధౌ మజ్జతాం మానవానా-

మాలమ్బార్థం వృషగిరిపతిస్త్వన్నిదేశాత్ప్రయుఙ్క్తే |

ప్రజ్ఞాసారం ప్రకృతిమహతా మూలభాగేన జుష్టం

శాఖాభేదైస్సుభగమనఘం శాశ్వతం శాస్త్రపాణిమ్ || ౪౬ ||

విద్వత్సేవాకతకనికషైర్వీతపఙ్కాశయానాం

పద్మాకాన్తః ప్రణయతి దయే దర్పణం తే స్వశాస్త్రమ్ |

లీలాదక్షాం త్వదనవసరే లాలయన్విప్రలిప్సాం

మాయాశాస్త్రాణ్యపి శమయితుం త్వత్ప్రపన్నప్రతీపాన్ || ౪౭ ||

దైవాత్ప్రాప్తే వృషగిరితటం దేహిని త్వన్నిదానా-

త్స్వామిన్పాహీత్యవశవచనే విన్దతి స్వాపమన్త్యమ్ |

దేవశ్శ్రీమాన్ దిశతి కరుణే దృష్టిమిచ్ఛంస్త్వదీయా-

ముద్ఘాతేన శ్రుతిపరిషదాముత్తరేణాభిముఖ్యమ్ || ౪౮ ||

శ్రేయస్సూతిం సకృదపి దయే సమ్మతాం యస్సఖీం తే

శీతోదారామలభత జనశ్శ్రీనివాసస్య దృష్టిమ్ |

దేవాదీనామయమనృణతాం దేహవత్త్వేఽపి విన్ద-

న్బన్ధాన్ముక్తో బలిభిరనఘైః పూర్యతే తత్ప్రయుక్తైః || ౪౯ ||

దివ్యాపాఙ్గం దిశసి కరుణే యేషు సద్దేశికాత్మా

క్షిప్రం ప్రాప్తా వృషగిరిపతిం క్షత్రబన్ధ్వాదయస్తే |

విశ్వాచార్యా విధిశివముఖాస్స్వాధికారోపరుద్ధా

మన్యే మాతా జడ ఇవ సుతే వత్సలా మాదృశే త్వమ్ || ౫౦ ||

అతికృపణోఽపి జన్తురధిగమ్య దయే భవతీ-

మశిథిలధర్మసేతుపదవీం రుచిరామచిరాత్ |

అమితమహోర్మిజాలమతిలఙ్ఘ్య భవామ్బునిధిం

భవతి వృషాచలేశపదపత్తననిత్యధనీ || ౫౧ ||

అభిముఖభావసమ్పదభిసమ్భవినాం భవినాం

క్వచిదుపలక్షితా క్వచిదభఙ్గురగూఢగతిః |

విమలరసావహా వృషగిరీశదయే భవతీ

సపది సరస్వతీవ శమయత్యఘమప్రతిఘమ్ || ౫౨ ||

అపి కరుణే జనస్య తరుణేన్దువిభూషణతా-

మపి కమలాసనత్వమపి ధామ వృషాద్రిపతేః |

తరతమతావశేన తనుతే నను తే వితతిః

పరహితవర్ష్మణా పరిపచేలిమకేలిమతీ || ౫౩ ||

ధృతభువనా దయే త్రివిధగత్యనుకూలతరా

వృషగిరినాథపాదపరిరమ్భవతీ భవతీ |

అవిదితవైభవాఽపి సురసిన్ధురివాతనుతే

సకృదవగాహమానమపతాపమపాపమపి || ౫౪ ||

నిగమసమాశ్రితా నిఖిలలోకసమృద్ధికరీ

భజదఘకూలముద్వహగతిః పరితప్తహితా |

ప్రకటితహంసమత్స్యకమఠాద్యవతారశతా

విబుధసరిచ్ఛ్రియం వృషగిరీశదయే వహసి || ౫౫ ||

జగతి మితమ్పచా త్వదితరా తు దయే తరలా

ఫలనియమోజ్ఝితా భవతి సన్తపనాయ పునః |

త్వమిహ నిరఙ్కుశప్రశకనాదివిభూతిమతీ

వితరసి దేహినాం నిరవధిం వృషశైలనిధిమ్ || ౫౬ ||

సకరుణలౌకికప్రభుపరిగ్రహనిగ్రహయో-

ర్నియతిముపాధిచక్రపరివృత్తిపరమ్పరయా |

వృషభమహీధరేశకరుణే వితరఙ్గయతాం

శ్రుతిమితసమ్పది త్వయి కథం భవితా విశయః || ౫౭ ||

వృషగిరికృష్ణమేఘజనితాం జనితాపహరాం

త్వదభిమతిం సువృష్టిముపజీవ్య నివృత్తతృషః |

బహుషు జలాశయేషు బహుమానమపోహ్య దయే

న జహతి సత్పథం జగతి చాతకవత్కృతినః || ౫౮ ||

త్వదుదయతూలికాభిరమునా వృషశైలజుషా

స్థిరతరశిల్పినైవ పరికల్పితచిత్రధియః |

యతిపతియామునప్రభృతయః ప్రథయన్తి దయే

జగతి హితం న నస్త్వయి భరన్యసనాదధికమ్ || ౫౯ ||

మృదుహృదయే దయే మృదితకామహితే మహితే

ధృతవిబుధే బుధేషు వితతాత్మధురే మధురే |

వృషగిరిసార్వభౌమదయితే మయి తే మహతీం

భవుకనిధే నిధేహి భవమూలహరాం లహరీమ్ || ౬౦ ||

అకూపారైరేకోదకసమయవైతణ్డికజవై-

రనిర్వాప్యాం క్షిప్రం క్షపయితుమవిద్యాఖ్యబడబామ్ |

కృపే త్వం తత్తాదృక్ప్రథిమవృషపృథ్వీధరపతి-

స్వరూపద్వైగుణ్యద్విగుణనిజబిన్దుః ప్రభవసి || ౬౧ ||

వివిత్సావేతాలీవిగమపరిశుద్ధేఽపి హృదయే

పటుప్రత్యాహారప్రభృతిపుటపాకప్రచకితాః |

నమన్తస్త్వాం నారాయణశిఖరికూటస్థకరుణే

నిరుద్ధత్వద్ద్రోహా నృపతిసుతనీతిం న జహతి || ౬౨ ||

అనన్యాధీనస్సన్భవతి పరతన్త్రః ప్రణమతాం

కృపే సర్వద్రష్టా న గణయతి తేషామపకృతిమ్ |

పతిస్త్వత్పారార్థ్యం ప్రథయతి వృషక్ష్మాధరపతి-

ర్వ్యవస్థాం వైయాత్యాదితి విఘటయన్తీ విహరసి || ౬౩ ||

అపాం పత్యుశ్శత్రూనసహనమునేర్ధర్మనిగలం

కృపే కాకస్యైకం హితమితి హినస్తి స్మ నయనమ్ |

విలీనస్వాతన్త్ర్యో వృషగిరిపతిస్త్వద్విహృతిభి-

ర్దిశత్యేవం దేవో జనితసుగతిం దణ్డనగతిమ్ || ౬౪ ||

నిషాదానాం నేతా కపికులపతిః కాపి శబరీ

కుచేలః కుబ్జా సా వ్రజయువతయో మాల్యకృదితి |

అమీషాం నిమ్నత్వం వృషగిరిపతేరున్నతిమపి

ప్రభూతైస్స్రోతోభిః ప్రసభమనుకమ్పే శమయసి || ౬౫ ||

త్వయా దృష్టస్తుష్టిం భజతి పరమేష్ఠీ నిజపదే

వహన్మూర్తీరష్టౌ విహరతి మృడానీపరిబృఢః |

బిభర్తి స్వారాజ్యం వృషశిఖరిశృఙ్గారికరుణే

శునాసీరో దేవాసురసమరనాసీరసుభటః || ౬౬ ||

దయే దుగ్ధోదన్వద్వ్యతియుతసుధాసిన్ధునయత-

స్త్వదాశ్లేషాన్నిత్యం జనితమృతసంజీవనదశాః |

స్వదన్తే దాన్తేభ్యశ్శ్రుతివదనకర్పూరగులికా

వివృణ్వన్తశ్చిత్తం వృషశిఖరివిశ్వమ్భరగుణాః || ౬౭ ||

జగజ్జన్మస్థేమప్రలయరచనాకేలిరసికో

విముక్త్యైకద్వారం విఘటితకవాటం ప్రణయినామ్ |

ఇతి త్వయ్యాయత్తం ద్వితయముపధీకృత్య కరుణే

విశుద్ధానాం వాచాం వృషశిఖరినాథస్స్తుతిపదమ్ || ౬౮ ||

కలిక్షోభోన్మీలత్క్షితికలుషకూలఙ్కషజవై-

రనుచ్ఛేదై రేతైరవటతటవైషమ్యరహితైః |

ప్రవాహైస్తే పద్మాసహచరపరిష్కారిణి కృపే

వికల్పన్తేఽనల్పా వృషశిఖరిణో నిర్ఝరగుణాః || ౬౯ ||

ఖిలం చేతోవృత్తేః కిమిదమితి విస్మేరభువనం

కృపే సింహక్ష్మాభృత్కృతముఖచమత్కారకరణమ్ |

భరన్యాసచ్ఛన్నప్రబలవృజినప్రాభృతభృతాం

ప్రతిప్రస్థానం తే శ్రుతినగరశృఙ్గాటకజుషః || ౭౦ ||

త్రివిధచిదచిత్సత్తాస్థేమప్రవృత్తినియామికా

వృషగిరివిభోరిచ్ఛా సా త్వం పరైరపరాహతా |

కృపణభరభృత్కిఙ్కుర్వాణప్రభూతగుణాన్తరా

వహసి కరుణే వైచక్షణ్యం మదీక్షణసాహసే || ౭౧ ||

వృషగిరిపతేర్హృద్యా విశ్వావతారసహాయినీ

క్షపితనిఖిలావద్యా దేవి క్షమాదినిషేవితా |

భువనజననీ పుంసాం భోగాపవర్గవిధాయినీ

వితమసి పదే వ్యక్తిం నిత్యాం బిభర్షి దయే స్వయమ్ || ౭౨ ||

స్వయముదయినస్సిద్ధాద్యావిష్కృతాశ్చ శుభాలయా

వివిధవిభవవ్యూహావాసాః పరం చ పదం విభోః |

వృషగిరిముఖేష్వేతేష్విచ్ఛావధి ప్రతిలబ్ధయే

దృఢవినిహితా నిశ్రేణిస్త్వం దయే నిజపర్వభిః || ౭౩ ||

హితమితి జగద్దృష్ట్యా క్లుప్తైరక్లుప్తఫలాన్తరై-

రమతివిహితైరన్యైర్ధర్మాయితైశ్చ యదృచ్ఛయా |

పరిణతబహుచ్ఛద్మా పద్మాసహాయదయే స్వయం

ప్రదిశసి నిజాభిప్రేతం నః ప్రశామ్యదపత్రపా || ౭౪ ||

అతివిధిశివైరైశ్వర్యాత్మానుభూతిరసైర్జనా-

నహృదయమిహోపచ్ఛన్ద్యైషామసఙ్గదశార్థినీ |

తృషితజనతాతీర్థస్నానక్రమక్షపితైనసాం

వితరసి దయే వీతాతఙ్కా వృషాద్రిపతేః పదమ్ || ౭౫ ||

వృషగిరిసుధాసిన్ధౌ జన్తుర్దయే నిహితస్త్వయా

భవభయపరీతాపచ్ఛిత్త్యై భజన్నఘమర్షణమ్ |

ముషితకలుషో ముక్తేరగ్రేసరైరభిపూర్యతే

స్వయముపనతైస్స్వాత్మానన్దప్రభృత్యనుబన్ధిభిః || ౭౬ ||

అనితరజుషామన్తర్మూలేఽప్యపాయపరిప్లవే

కృతవిదనఘా విచ్ఛిద్యైషాం కృపే యమవశ్యతామ్ |

ప్రపదనఫలప్రత్యాదేశప్రసఙ్గవివర్జితం

ప్రతివిధిముపాధత్సే సార్ధం వృషాద్రిహితైషిణా || ౭౭ ||

క్షణవిలయినాం శాస్త్రార్థానాం ఫలాయ నివేశితే

పితృసురగణే నిర్వేశాత్ప్రాగపి ప్రలయం గతే |

అధిగతవృషక్ష్మాభృన్నాథామకాలవశంవదాం

ప్రతిభువమిహ వ్యాచఖ్యుస్త్వాం కృపే నిరుపప్లవామ్ || ౭౮ ||

త్వదుపసదనాదద్య శ్వో వా మహాప్రలయేఽపి వా

వితరతి నిజం పాదామ్భోజం వృషాచలశేఖరః |

తదిహ కరుణే తత్తత్క్రీడాతరఙ్గపరమ్పరా-

తరతమతయా జుష్టాయాస్తే దురత్యయతాం విదుః || ౭౯ ||

ప్రణిహితధియాం త్వత్సమ్పృక్తే వృషాద్రిశిఖామణౌ

ప్రసృమరసుధాధారాకారా ప్రసీదతి భావనా |

దృఢమితి దయే దత్తాస్వాదం విముక్తివలాహకం

నిభృతగరుతో నిధ్యాయన్తి స్థిరాశయచాతకాః || ౮౦ ||

కృపే విగతవేలయా కృతసమగ్రపోషైస్త్వయా

కలిజ్వలనదుర్గతే జగతి కాలమేఘాయితమ్ |

వృషక్షితిధరాదిషు స్థితిపదేషు సానుప్లవై-

ర్వృషాద్రిపతివిగ్రహైర్వ్యపగతాఖిలావగ్రహైః || ౮౧ ||

ప్రసూయ వివిధం జగత్తదభివృద్ధయే త్వం దయే

సమీక్షణవిచిన్తనప్రభృతిభిస్స్వయం తాదృశైః |

విచిత్రగుణచిత్రితాం వివిధదోషవైదేశికీం

వృషాచలపతేస్తనుం విశసి మత్స్యకూర్మాదికామ్ || ౮౨ ||

యుగాన్తసమయోచితం భజతి యోగనిద్రారసం

వృషక్షితిభృదీశ్వరే విహరణక్రమాజ్జాగ్రతి |

ఉదీర్ణచతురర్ణవీకదనవేదినీం మేదినీం

సముద్ధృతవతీ దయే త్వదభిజుష్టయా దంష్ట్రయా || ౮౩ ||

సటాపటలభీషణే సరభసాట్టహాసోద్భటే

స్ఫురత్క్రుధి పరిస్ఫుటభ్రుకుటికేఽపి వక్త్రే కృతే |

దయే వృషగిరీశితుర్దనుజడిమ్భదత్తస్తనా

సరోజసదృశా దృశా సముదితాకృతిర్దృశ్యసే || ౮౪ ||

ప్రసక్తమధునా విధిప్రణిహితైస్సపర్యోదకై-

స్సమస్తదురితచ్ఛిదా నిగమగన్ధినా త్వం దయే |

అశేషమవిశేషతస్త్రిజగదఞ్జనాద్రీశితు-

శ్చరాచరమచీకరశ్చరణపఙ్కజేనాఙ్కితమ్ || ౮౫ ||

పరశ్వథతపోధనప్రథనసత్కృతూపాకృత-

క్షితీశ్వరపశుక్షరత్క్షతజకుఙ్కుమస్థాసకైః |

వృషాచలదయాలునా నను విహర్తుమాలిప్యథాః

నిధాయ హృదయే దయే నిహతరక్షితానాం హితమ్ || ౮౬ ||

కృపే కృతజగద్ధితే కృపణజన్తుచిన్తామణే

రమాసహచరం తదా రఘుధురీణయన్త్యా త్వయా |

వ్యభజ్యత సరిత్పతిస్సకృదవేక్షణాత్తత్క్షణా-

త్ప్రకృష్టబహుపాతకప్రశమహేతునా సేతునా || ౮౭ ||

కృపే పరవతస్త్వయా వృషగిరీశితుః క్రీడితం

జగద్ధితమశేషతస్తదిదమిత్థమర్థాప్యతే |

మదచ్ఛలపరిచ్యుతప్రణతదుష్కృతప్రేక్షితై-

ర్హతప్రబలదానవైర్హలధరస్య హేలాశతైః || ౮౮ ||

ప్రభూతవిబుధద్విషద్భరణఖిన్నవిశ్వమ్భరా-

భరాపనయనచ్ఛలాత్త్వమవతార్య లక్ష్మీధరమ్ |

నిరాకృతవతీ దయే నిగమసౌధదీపశ్రియా

విపశ్చిదవిగీతయా జగతి గీతయాఽన్ధం తమః || ౮౯ ||

వృషాద్రిహయసాదినః ప్రబలదోర్మరుత్ప్రేఙ్ఖిత-

స్త్విషా స్ఫుటతటిద్గుణస్త్వదవసేకసంస్కారవాన్ |

కరిష్యతి దయే కలిప్రబలఘర్మనిర్మూలనం

పునః కృతయుగాఙ్కురం భువి కృపాణధారాధరః || ౯౦ ||

విశ్వోపకారమితి నామ సదా దుహానా-

మద్యాపి దేవి భవతీమవధీరయన్తమ్ |

నాథే నివేశయ వృషాద్రిపతౌ దయే త్వం

న్యస్తస్వరక్షణభరం త్వయి మాం త్వయైవ || ౯౧ ||

నైసర్గికేణ తరసా కరుణే నియుక్తా

నిమ్నేతరేఽపి మయి తే వితతిర్యది స్యాత్ |

విస్మాపయేద్వృషగిరీశ్వరమప్యవార్యా

వేలాతిలఙ్ఘనదశేవ మహామ్బురాశేః || ౯౨ ||

విజ్ఞాతశాసనగతిర్విపరీతవృత్త్యా

వృత్రాదిభిః పరిచితాం పదవీం భజామి |

ఏవం విధే వృషగిరీశదయే మయి త్వం

దీనే విభోశ్శమయ దణ్డధరత్వలీలామ్ || ౯౩ ||

మాసాహసోక్తిఘనకఞ్చుకవఞ్చితాన్యః

పశ్యత్సు తేషు విదధామ్యతిసాహసాని |

పద్మాసహాయకరుణే న రుణత్సి కిం త్వం

ఘోరం కులిఙ్గశకునేరివ చేష్టితం మే || ౯౪ ||

విక్షేపమర్హసి దయే విపలాయితేఽపి

వ్యాజం విభావ్య వృషశైలపతేర్విహారమ్ |

స్వాధీనసత్వసరణిస్స్వయమత్ర జన్తౌ

ద్రాఘీయసీ దృఢతరా గుణవాగురా త్వమ్ || ౯౫ ||

సన్తన్యమానమపరాధగణం విచిన్త్య

త్రస్యామి హన్త భవతీం చ విభావయామి |

అహ్నాయ మే వృషగిరీశదయే జహీమా-

మాశీవిషగ్రహణకేలినిభామవస్థామ్ || ౯౬ ||

ఔత్సుక్యపూర్వముపహృత్య మహాపరాధా-

న్మాతః ప్రసాదయితుమిచ్ఛతి మే మనస్త్వామ్ |

ఆలిహ్య తాన్నిరవశేషమలబ్ధతృప్తి-

స్తామ్యస్యహో వృషగిరీశధృతా దయే త్వమ్ || ౯౭ ||

జహ్యాద్వృషాచలపతిః ప్రతిఘేఽపి న త్వాం

ఘర్మోపతప్త ఇవ శీతలతాముదన్వాన్ |

సా మామరున్తుదభరన్యసనానువృత్తి-

స్తద్వీక్షణైః స్పృశ దయే తవ కేలిపద్మైః || ౯౮ ||

దృష్టేఽపి దుర్బలధియం దమనేఽపి దృప్తం

స్నాత్వాఽపి ధూలిరసికం భజనేఽపి భీమమ్ |

బద్ధ్వా గృహాణ వృషశైలపతేర్దయే మాం

త్వద్వారణం స్వయమనుగ్రహశృఙ్ఖలాభిః || ౯౯ ||

నాతః పరం కిమపి మే త్వయి నాథనీయం

మాతర్దయే మయి కురుష్వ తథా ప్రసాదమ్ |

బద్ధాదరో వృషగిరిప్రణయీ యథాఽసౌ

ముక్తానుభూతిమిహ దాస్యతి మే ముకున్దః || ౧౦౦ ||

నిస్సీమవైభవజుషాం మిషతాం గుణానాం

స్తోతుర్దయే వృషగిరీశగుణేశ్వరీం త్వామ్ |

తైరేవ నూనమవశైరభినన్దితం మే

సత్యాపితం తవ బలాదకుతోభయత్వమ్ || ౧౦౧ ||

అద్యాపి తద్వృషగిరీశదయే భవత్యా-

మారంభమాత్రమనిదం ప్రథమస్తుతీనామ్ |

సన్దర్శితస్వపరనిర్వహణా సహేథాః

మన్దస్య సాహసమిదం త్వయి వన్దినో మే || ౧౦౨ ||

ప్రాయో దయే త్వదనుభావమహామ్బురాశౌ

ప్రాచేతసప్రభృతయోఽపి పరం తటస్థాః |

తత్రావతీర్ణమతలస్పృశమాప్లుతం మాం

పద్మాపతేః ప్రహసనోచితమాద్రియేథాః || ౧౦౩ ||

వేదాన్తదేశికపదే వినివేశ్య బాలం

దేవో దయాశతకమేతదవాదయన్మామ్ |

వైహారికేణ విధినా సమయే గృహీతం

వీణావిశేషమివ వేఙ్కటశైలనాథః || ౧౦౪ ||

అనవధిమధికృత్య శ్రీనివాసానుకమ్పా-

మవితథవిషయత్వాద్విశ్వమవ్రీళయన్తీ |

వివిధకుశలనీవీ వేఙ్కటేశప్రసూతా

స్తుతిరియమనవద్యా శోభతే సత్వభాజామ్ || ౧౦౫ ||

శతకమిదముదారం సమ్యగభ్యస్యమానాన్

వృషగిరిమధిరుహ్య వ్యక్తమాలోకయన్తీ |

అనితరశరణానామాధిరాజ్యేఽభిషిఞ్చే-

చ్ఛమితవిమతపక్షా శార్ఙ్గధన్వానుకమ్పా || ౧౦౬ ||

విశ్వానుగ్రహమాతరం వ్యతిషజత్స్వర్గాపవర్గాం సుధా-

సధ్రీచీమివ వేఙ్కటేశ్వరకవిర్భక్త్యా దయామస్తుత |

పద్మానామిహ యద్విధేయభగవత్సఙ్కల్పకల్పద్రుమా-

జ్జఞ్ఝామారుతధూతచూతనయతస్సామ్పాతికోఽయం క్రమః || ౧౦౭ ||

కామం సన్తు మిథః కరమ్బితగుణావద్యాని పద్యాని నః

కస్యాస్మిన్ శతకే సదమ్బుకతకే దోషశ్రుతిం క్షామ్యతి |

నిష్ప్రత్యూహవృషాద్రినిర్ఝరఝరత్కారచ్ఛలేనోచ్చల-

ద్దీనాలమ్బనదివ్యదమ్పతిదయాకల్లోలకోలాహలః || ౧౦౮ ||

ఇతి శ్రీకవితార్కికసింహస్య సర్వతన్త్రస్వతన్త్రస్య శ్రీమద్వేఙ్కటనాథస్య వేదాన్తాచార్యస్య కృతిషు దయాశతకమ్ |